{
    "translation": "John Wycliffe Bible (c.1395)",
    "abbreviation": "wycliffe",
    "lang": "enm",
    "language": "English",
    "direction": "LTR",
    "encoding": "UTF-8",
    "book_nr": 51,
    "book_name": "Colossians",
    "chapter": 3,
    "name": "Colossians 3",
    "verses": [
        {
            "chapter": 3,
            "verse": 1,
            "name": "Colossians 3:1",
            "text": "Therfor if ye han risun togidere with Crist, seke ye tho thingis that ben aboue, where Crist is sittynge in the riythalf of God. "
        },
        {
            "chapter": 3,
            "verse": 2,
            "name": "Colossians 3:2",
            "text": "Sauere ye tho thingis, that ben aboue, not tho that ben on the erthe. "
        },
        {
            "chapter": 3,
            "verse": 3,
            "name": "Colossians 3:3",
            "text": "For ye ben deed, and youre lijf is hid with Crist in God. "
        },
        {
            "chapter": 3,
            "verse": 4,
            "name": "Colossians 3:4",
            "text": "For whanne Crist schal appere, youre lijf, thanne also ye schulen appere with hym in glorie. "
        },
        {
            "chapter": 3,
            "verse": 5,
            "name": "Colossians 3:5",
            "text": "Therfor sle ye youre membris, whiche ben on the erthe, fornycacioun, vnclennesse, letcherie, yuel coueitise, and aueryse, which is seruyse of mawmetis; "
        },
        {
            "chapter": 3,
            "verse": 6,
            "name": "Colossians 3:6",
            "text": "for whiche thingis the wraththe of God cam on the sones of vnbileue; "
        },
        {
            "chapter": 3,
            "verse": 7,
            "name": "Colossians 3:7",
            "text": "in whiche also ye walkiden sum tyme, whanne ye lyueden in hem. "
        },
        {
            "chapter": 3,
            "verse": 8,
            "name": "Colossians 3:8",
            "text": "But now putte ye awei alle thingis, wraththe, indignacioun, malice, blasfemye and foule word of youre mouth. "
        },
        {
            "chapter": 3,
            "verse": 9,
            "name": "Colossians 3:9",
            "text": "Nyle ye lie togidere; spuyle ye you fro the elde man with his dedes, and clothe ye the newe man, "
        },
        {
            "chapter": 3,
            "verse": 10,
            "name": "Colossians 3:10",
            "text": "that is maad newe ayen in to the knowing of God, aftir the ymage of hym that made hym; "
        },
        {
            "chapter": 3,
            "verse": 11,
            "name": "Colossians 3:11",
            "text": "where is not male and female, hethene man and Jew, circumcisioun and prepucie, barbarus and Scita, bonde man and fre man, but alle thingis and in alle thingis Crist. "
        },
        {
            "chapter": 3,
            "verse": 12,
            "name": "Colossians 3:12",
            "text": "Therfor ye, as the chosun of God, hooli and louyd, clothe you with the entrailis of merci, benygnite, and mekenesse, temperaunce, pacience; "
        },
        {
            "chapter": 3,
            "verse": 13,
            "name": "Colossians 3:13",
            "text": "and support ye echon other, and foryyue to you silf, if ony man ayens ony hath a querele; as the Lord foryaf to you, so also ye. "
        },
        {
            "chapter": 3,
            "verse": 14,
            "name": "Colossians 3:14",
            "text": "And vpon alle these thingis haue ye charite, that is the boond of perfeccioun. "
        },
        {
            "chapter": 3,
            "verse": 15,
            "name": "Colossians 3:15",
            "text": "And the pees of Crist enioye in youre hertis, in which ye ben clepid in o bodi, and be ye kynde. "
        },
        {
            "chapter": 3,
            "verse": 16,
            "name": "Colossians 3:16",
            "text": "The word of Crist dwelle in you plenteuousli, in al wisdom; and teche and moneste you silf in salmes, and ympnes, and spiritual songis, in grace synginge in youre hertis to the Lord. "
        },
        {
            "chapter": 3,
            "verse": 17,
            "name": "Colossians 3:17",
            "text": "Al thing, what euere thing ye don, in word or in dede, alle thingis in the name of oure Lord Jhesu Crist, doynge thankyngis to God and to the fadir bi hym. "
        },
        {
            "chapter": 3,
            "verse": 18,
            "name": "Colossians 3:18",
            "text": "Wymmen, be ye sugetis to youre hosebondis, as it bihoueth in the Lord. "
        },
        {
            "chapter": 3,
            "verse": 19,
            "name": "Colossians 3:19",
            "text": "Men, loue ye youre wyues, and nyle ye be bittere to hem. "
        },
        {
            "chapter": 3,
            "verse": 20,
            "name": "Colossians 3:20",
            "text": "Sones, obeie ye to youre fadir and modir bi alle thingis; for this is wel plesinge in the Lord. "
        },
        {
            "chapter": 3,
            "verse": 21,
            "name": "Colossians 3:21",
            "text": "Fadris, nyle ye terre youre sones to indignacioun, that thei be not maad feble hertid. "
        },
        {
            "chapter": 3,
            "verse": 22,
            "name": "Colossians 3:22",
            "text": "Seruauntis, obeie ye bi alle thingis to fleischli lordis, not seruynge at iye, as plesynge to men, but in symplenesse of herte, dredinge the Lord. "
        },
        {
            "chapter": 3,
            "verse": 23,
            "name": "Colossians 3:23",
            "text": "What euer ye doen, worche ye of wille, as to the Lord and not to men; "
        },
        {
            "chapter": 3,
            "verse": 24,
            "name": "Colossians 3:24",
            "text": "witinge that of the Lord ye schulen take yelding of eritage. Serue ye to the Lord Crist. "
        },
        {
            "chapter": 3,
            "verse": 25,
            "name": "Colossians 3:25",
            "text": "For he that doith iniurie, schal resseyue that that he dide yuele; and acceptacioun of persoones is not anentis God.  "
        }
    ]
}