{
    "translation": "Uma NT",
    "abbreviation": "uma",
    "lang": "ppk",
    "language": "Uma",
    "direction": "LTR",
    "encoding": "",
    "book_nr": 51,
    "book_name": "Colossians",
    "chapter": 3,
    "name": "Colossians 3",
    "verses": [
        {
            "chapter": 3,
            "verse": 1,
            "name": "Colossians 3:1",
            "text": "Kita' to mepangala' hi Kristus, ma'ala ta'uli' rapotuwu' nculii' -tamo hangkaa-ngkania hante Kristus, apa' Alata'ala mpowai' -ta katuwua' to bo'u ngkai posidaia' -ta hante Hi'a. Jadi', apa' rapotuwu' nculii' mpu'u-tamo hangkaa-ngkania hante Kristus-e, kana tapali' -mi napa to hi suruga, hi kariaa-na Kristus mohura hi mali ngka'ana Alata'ala."
        },
        {
            "chapter": 3,
            "verse": 2,
            "name": "Colossians 3:2",
            "text": "Batua-na: tapenonoi katuwu' -ta to bo'u to mosidai' hante Kristus to hi suruga, neo' -pi ntora tapenonoi katuwua' -ta to hi dunia' -wadi."
        },
        {
            "chapter": 3,
            "verse": 4,
            "name": "Colossians 3:4",
            "text": "Apa' kita' toi, ma'ala ta'uli' mate-tamo hangkaa-ngkania hante Hi'a. Pai' tarata-mi katuwua' to bo'u ngkai Kristus, to mo'oha' dohe Alata'ala hi suruga. Kristus toe-imile to mpowai' -ta katuwua' to bo'u. Tempo toi, ko'ia-i tahiloi. Tapi' ane rata nculii' -i-damo mpai', napopehuwu-mi kabohe tuwu' -na. Pai' kita' wo'o mpai' ompi', rapomobohe wo'o-ta-tawo hangkaa-ngkania hante Hi'a."
        },
        {
            "chapter": 3,
            "verse": 5,
            "name": "Colossians 3:5",
            "text": "Jadi', apa' mate-tamo hangkaa-ngkania hante Kristus-e, kana tabahaka-mi kehi-ta to mosidai' hante tuwu' -ta to ri'ulu. Neo' mobualo', neo' mogau' sala' ba mpobabehi gau' -gau' to uma tumotoa ntani' -na. Neo' mpokahina to dada'a, neo' mpokahina anu doo. Apa' tauna to mogau' hewa toe, ma'ala ta'uli' mepue' -ra hi napa to rapokahina toe."
        },
        {
            "chapter": 3,
            "verse": 6,
            "name": "Colossians 3:6",
            "text": "Pai' Alata'ala bate mpokaroe tauna to mpotiboki hawa' -na."
        },
        {
            "chapter": 3,
            "verse": 7,
            "name": "Colossians 3:7",
            "text": "Ri'ulu, kako'ia-ni mengkoru hi Alata'ala, bate toe-mi gau' -ni."
        },
        {
            "chapter": 3,
            "verse": 8,
            "name": "Colossians 3:8",
            "text": "Tapi' tempo toi, tabahaka mpu'u-mi hawe'ea kehi to hewa toe. Neo' moroe, neo' mowuku nono, neo' mohuku'. Neo' -hawo howa' ngkai wiwi-ta lolita peruge', petuntui' ba petarahu."
        },
        {
            "chapter": 3,
            "verse": 9,
            "name": "Colossians 3:9",
            "text": "Neo' moboa' hi doo. Tabahakai hawe'ea kehi to hewa toe, apa' tebahaka-tamo ngkai katuwu' -ta pai' gau' -ta to ri'ulu to tatuku' kako'ia-ta mepangala' hi Pue' Yesus,"
        },
        {
            "chapter": 3,
            "verse": 10,
            "name": "Colossians 3:10",
            "text": "pai' tarata-mi katuwua' to bo'u, apa' Alata'ala mpajadi' -ta manusia' to bo'u. Nabo'ui ncuu nono-ta bona tatuku' kehi-na, pai' bona ta'inca mpu'u-mpu'u-i."
        },
        {
            "chapter": 3,
            "verse": 11,
            "name": "Colossians 3:11",
            "text": "Jadi', apa' napajadi' -tamo manusia' to bo'u-e, uma-pi tapoposisala to Yahudi pai' to bela-ra to Yahudi, apa' hi poncilo Alata'ala hibalia-wadi tauna to ratini' pai' tauna to uma ratini'. Uma napelence tauna to mosikola ba to uma mosikola, maradika ba batua. Kristus toe-mi poko-na ngkai hawe'ea, pai' Hi'a-mi to mpo'ohai' -ta hawe'ea."
        },
        {
            "chapter": 3,
            "verse": 12,
            "name": "Colossians 3:12",
            "text": "Alata'ala mpoka'ahi' -ta pai' napelihi-tamo jadi' bagia-na to moroli'. Toe pai' kana mometulungi-ta pai' lompe' nono-ta hadua bo hadua, pakadingki' nono-ta, paka'olu kehi-ta, pai' mosabara hi doo."
        },
        {
            "chapter": 3,
            "verse": 13,
            "name": "Colossians 3:13",
            "text": "Neo' ntima' sala' doo ba mowuku nono hi doo. Ampungi doo to masala' hi kita'. Hewa Pue' mpo'ampungi sala' -ta, wae wo'o kita' kana mpo'ampungi doo-ta to masala' hi kita' hante karoli' nono-ta."
        },
        {
            "chapter": 3,
            "verse": 14,
            "name": "Colossians 3:14",
            "text": "Meliu ngkai toe, kana momepoka'ahi' -ta, apa' ane momepoka'ahi' -ta, hintuwu' -tamo hante uma ria ruke-na."
        },
        {
            "chapter": 3,
            "verse": 15,
            "name": "Colossians 3:15",
            "text": "Alata'ala mpokio' -tamo pai' napajadi' -ta hewa hawoto lau hi rala posidaia' -ta hante Kristus. Jadi', neo' tababehi napa-napa to mpokero kahintuwuaa' pai' karodoa nono-ta to ngkai Kristus toe. Pai' mpo'uli' tarima kasi oa' -ta."
        },
        {
            "chapter": 3,
            "verse": 16,
            "name": "Colossians 3:16",
            "text": "Lolita Kristus kana tapo'enu', tapoluba', pai' tapoinono oa'. Mometudui' pai' momerohoi ngkanono-ta, ntuku' hawe'ea kanotoa nono-ta. Mpoporona' -ta mazmur, rona' pe'une' pai' rona' ntani' -na to nawai' -taka Inoha' Tomoroli'. Morona' -ta ngkai nono-ta mpu'u mpo'uli' tarima kasi hi Alata'ala."
        },
        {
            "chapter": 3,
            "verse": 17,
            "name": "Colossians 3:17",
            "text": "Napa-napa to tababehi, to talolita, babehi pai' lolita-mi hi rala hanga' Pue' Yesus. Pai' uli' tarima kasi hi Alata'ala to Tuama hi rala hanga' Pue' Yesus."
        },
        {
            "chapter": 3,
            "verse": 18,
            "name": "Colossians 3:18",
            "text": "Hawe'ea to motomanei, mengkoru-koi hi tomane-ni, hewa to masipato' hi tobine to mpotuku' Pue'."
        },
        {
            "chapter": 3,
            "verse": 19,
            "name": "Colossians 3:19",
            "text": "Pai' koi' wo'o tomane, neo' -koi karapo' hi tobine-ni, kana nipoka'ahi' -ra."
        },
        {
            "chapter": 3,
            "verse": 20,
            "name": "Colossians 3:20",
            "text": "Ana' -ana', tuku' hawe'ea hawa' totu'a-ni, apa' toe to masipato' hi ana' to mpotuku' Pue', pai' toe to napokono Pue'."
        },
        {
            "chapter": 3,
            "verse": 21,
            "name": "Colossians 3:21",
            "text": "Pai' koi' to tuama, neo' nipedahi nono ana' -ni, bona neo' mpai' mere' nono-ra."
        },
        {
            "chapter": 3,
            "verse": 22,
            "name": "Colossians 3:22",
            "text": "Ompi' -ompi' to tuwu' batua, tuku' hawe'ea hawa' maradika-ni to hi dunia' toi. Neo' nituku' hawa' -ra nto'u-ni rahilo-wadi apa' kadoko' -ni ra'une' -wadi. Tuku' hawa' -ra ngkai kabula nono-ni, hewa pengkoru-ni hi Pue'."
        },
        {
            "chapter": 3,
            "verse": 23,
            "name": "Colossians 3:23",
            "text": "Napa-napa pobago to rahubui-kokoi, nipobago hante nono mpu'u, niponcawa pobago-ni hi Pue', uma muntu' hi manusia'."
        },
        {
            "chapter": 3,
            "verse": 24,
            "name": "Colossians 3:24",
            "text": "Penonoi-koi: Pue' moto mpai' to mpowai' -koi hiwili-na, hewa to najanci hi hawe'ea tauna to napo'ana'. Kristus, Hi'a-mi Maradika-ni, pai' koi' -mi batua-na."
        },
        {
            "chapter": 3,
            "verse": 25,
            "name": "Colossians 3:25",
            "text": "Hema-hema to mpobabehi to dada'a, narata moto mpai' hiwili bago-na to dada'a, apa' Pue' uma mpelence tauna."
        }
    ]
}