{
    "translation": "Uma NT",
    "abbreviation": "uma",
    "lang": "ppk",
    "language": "Uma",
    "direction": "LTR",
    "encoding": "",
    "book_nr": 42,
    "book_name": "Luke",
    "chapter": 14,
    "name": "Luke 14",
    "verses": [
        {
            "chapter": 14,
            "verse": 1,
            "name": "Luke 14:1",
            "text": "Hangkani nto'u Eo Sabat, Yesus hilou ngkoni' hi tomi hadua pangkeni to Parisi. Bula-na hi ree, ralelemata-i mpopali' sala' -na."
        },
        {
            "chapter": 14,
            "verse": 2,
            "name": "Luke 14:2",
            "text": "Muu-mule' rata hadua tauna to mohaki' ngkumowu, mowoto witi' pai' pale-na."
        },
        {
            "chapter": 14,
            "verse": 3,
            "name": "Luke 14:3",
            "text": "Yesus mpekune' -ra guru agama pai' to Parisi, na'uli': \"Ntuku' atura agama-ta, ma'ala-ta mpaka'uri' topeda' hi Eo Sabat, ba uma-di?\""
        },
        {
            "chapter": 14,
            "verse": 4,
            "name": "Luke 14:4",
            "text": "Guru agama pai' to Parisi toera, oja' -ra mpotompoi' -i. Ngkai ree, Yesus mpojama topeda' toei, napaka'uri' pai' nahubui-i hilou."
        },
        {
            "chapter": 14,
            "verse": 5,
            "name": "Luke 14:5",
            "text": "Oti toe na'uli' -raka: \"Ane rapa' -na ria ana' -ta ba japi-ta monawu' hi rala buwu hi Eo Sabat, ha uma sahu ta'ore' -i tumai, nau' hi eo pepuea' -e?\""
        },
        {
            "chapter": 14,
            "verse": 6,
            "name": "Luke 14:6",
            "text": "Aga uma hema to daho' mpohono' -i."
        },
        {
            "chapter": 14,
            "verse": 7,
            "name": "Luke 14:7",
            "text": "Hi tomi to Parisi toe, Yesus mpohilo ria torata to doko' mohura hi pohuraa karabilaa'. Toe pai' natudui' -ra hante lolita rapa' toi."
        },
        {
            "chapter": 14,
            "verse": 8,
            "name": "Luke 14:8",
            "text": "Na'uli': \"Ane rakio' -ko hilou hi posusaa' poncamokoa, neo' mohura hi pohuraa karabilaa'. Meka' ba ria-di mpai' to rakio' to meliu karabila' -na ngkai iko."
        },
        {
            "chapter": 14,
            "verse": 9,
            "name": "Luke 14:9",
            "text": "Tumai mpai' pue' tomi mpo'uli' -koko hewa toi: `Wai' -ki hi'a-hana pohuraa tetu!' Me'ea' -ko mpai' hilou mohura hi kadingkia' -na."
        },
        {
            "chapter": 14,
            "verse": 10,
            "name": "Luke 14:10",
            "text": "Jadi', ane rakio' -ko hilou hi posusaa', agina mohura-ko hi kadingkia' -na, bona pue' tomi mpai' mpo'uli' -koko: `Bale, mai-ta mohura hi pohuraa to lompe' toe mai.' Ane hewa toe, rabila' lau-moko hi mata ntodea."
        },
        {
            "chapter": 14,
            "verse": 11,
            "name": "Luke 14:11",
            "text": "Hawe'ea to mpomolangko nono-ra, Pue' Ala mpodingkihi-ra, pai' hawe'ea to mpakadingki' nono-ra, Pue' Ala mpomolangko-ra.\""
        },
        {
            "chapter": 14,
            "verse": 12,
            "name": "Luke 14:12",
            "text": "Oti toe, mololita wo'o-imi Yesus mpololitai pue' tomi. Na'uli': \"Ane takio' tauna ngkaralai posusa' -ta, ba ngkoni' mpo'eo ba ngkabengia, neo' mpokio' bale-ta, ompi' -ta, ba topo'ua' rala ngata. Apa' bate rakio' wo'o-ta mpai', alaa-na tehiwili-mi kehi-ta."
        },
        {
            "chapter": 14,
            "verse": 13,
            "name": "Luke 14:13",
            "text": "Jadi' ane tababehi posusa', kio' tauna tokabu, tokeru, topungku pai' towero."
        },
        {
            "chapter": 14,
            "verse": 14,
            "name": "Luke 14:14",
            "text": "Ane wae pobabehi-ta, Pue' Ala mpogane' -ta mpai', apa' tauna to hewa toe uma mpokulei' mpohiwili kehi-ta. Kehi-ta tetu nahiwili moto mpai' Pue' Ala hi Eo Kiama, nto'u kanapotuwu' -ra nculii' tauna to monoa' hi poncilo-na.\""
        },
        {
            "chapter": 14,
            "verse": 15,
            "name": "Luke 14:15",
            "text": "Bula-ra ngkoni' toe, hadua torata mpo'epe lolita-na Yesus, pai' na'uli' -ki: \"Marasi' tauna to mpokaralai posusa' hi rala Kamagaua' -na Alata'ala.\""
        },
        {
            "chapter": 14,
            "verse": 16,
            "name": "Luke 14:16",
            "text": "Na'uli' Yesus mpo'uli' -ki tauna toei: \"Hangkani ria hadua tauna to mpobabehi susa' bohe, pai' mpokio' wori' tauna."
        },
        {
            "chapter": 14,
            "verse": 17,
            "name": "Luke 14:17",
            "text": "Sadia-mi omea, nahubui pahawaa' -na hilou mpo'uli' -raka to rakio': `Mai-tamo hilou hi posusaa', apa' sadia-mi omea.'"
        },
        {
            "chapter": 14,
            "verse": 18,
            "name": "Luke 14:18",
            "text": "Aga tauna to rakio' toera, motance omea-ra. To lomo' -na mpo'uli': `Lako' me'oli tana' -a, pai' kana hilou ulu kupehiloi. Merapi' ampu-a, uma-a tilou.'"
        },
        {
            "chapter": 14,
            "verse": 19,
            "name": "Luke 14:19",
            "text": "To hadua-na mpo'uli': `Lako' mpo'oli japi-a lima moko, hilou kuperao mpake' -ra mopajeko'. Merapi' ampu-a, uma-a tilou!'"
        },
        {
            "chapter": 14,
            "verse": 20,
            "name": "Luke 14:20",
            "text": "To ntani' -na wo'o mpo'uli': `Aku' lako' oti ncamoko-a. Uma-a bisa tilou.'"
        },
        {
            "chapter": 14,
            "verse": 21,
            "name": "Luke 14:21",
            "text": "\"Pahawaa' toei nculii' hilou hi pue' susa' mpowoli' lolita-ra toe. Uma-pi mowo kamoroe-na pue' susa', na'uli' -ki pahawaa' -na: `Pesahui hilou hi karajaa pai' hi porompengaa ohea hi rala ngata. Bawai-ramo tumai tokabu, tokeru, towero, pai' topungku.' Hilou mpu'u-imi-hawo pahawaa' toei mpotuku' hawa' pue' susa'."
        },
        {
            "chapter": 14,
            "verse": 22,
            "name": "Luke 14:22",
            "text": "\"Karata-na nculii', na'uli' mpo'uli' -ki pue' susa': `Tuama, hawa' -nu kupopomako' -mi, aga ko'ia ihia' tomi-nu, ria-pidi pohuraa.'"
        },
        {
            "chapter": 14,
            "verse": 23,
            "name": "Luke 14:23",
            "text": "\"Na'uli' pue' susa': `Hilou tena-ko hi ohea bohe pai' ohea to kedi' hi mali ngata, pewuku-ra tauna tumai, bona tomi-ku ihia' hobo'."
        },
        {
            "chapter": 14,
            "verse": 24,
            "name": "Luke 14:24",
            "text": "Mpu'u ku'uli', ngkai hawe'ea tauna to kukio' toera lou, uma haduaa-ra to mpokoni' ba apa-apa hi posusa' -ku.'\""
        },
        {
            "chapter": 14,
            "verse": 25,
            "name": "Luke 14:25",
            "text": "Wori' tauna mpotuku' Yesus rala pomakoa' -na. Yesus mewili' hi tauna toera pai' na'uli' -raka:"
        },
        {
            "chapter": 14,
            "verse": 26,
            "name": "Luke 14:26",
            "text": "\"Tauna to doko' mpotuku' -a, aga uma meliu pe'ahi' -na hi Aku' ngkai pe'ahi' -na hi tina-na, tuama-na, tobine-na, ana' -na, ompi' -na, ba paiana woto-na moto-mi, uma-i ma'ala jadi' topetuku' -ku."
        },
        {
            "chapter": 14,
            "verse": 27,
            "name": "Luke 14:27",
            "text": "Tauna to jadi' topetuku' -ku kana mpopaha'a kaju parika' -na-- batua-na kana sadia-i mporata kaparia ba paiana rapatehi sabana petuku' -na hi Aku'. Jadi', tauna to uma dota mpopaha'a kaju parika' -na pai' mpotuku' -a, uma-i ma'ala jadi' topetuku' -ku."
        },
        {
            "chapter": 14,
            "verse": 28,
            "name": "Luke 14:28",
            "text": "\"Ane ria to doko' mpowangu tomi bohe, napohura-ki ulu mporeke ongkoso' pompowangu-na, ba hono' mpai' doi-na ba uma-di."
        },
        {
            "chapter": 14,
            "verse": 29,
            "name": "Luke 14:29",
            "text": "Apa' ane mpolia' natu'u-mi parawatu-na pai' uma hudu nawangu apa' naka'otii doi-na, hawe'ea tauna to mpohilo mpotawai-i,"
        },
        {
            "chapter": 14,
            "verse": 30,
            "name": "Luke 14:30",
            "text": "ra'uli': `Ii, ni'anu-di doko' mpowangu tomi bohe, ntaa' uma-di hono' doi-nae!'"
        },
        {
            "chapter": 14,
            "verse": 31,
            "name": "Luke 14:31",
            "text": "\"Wae wo'o, ane hadua magau' to ria tantara-na hampulu' ncobu manga'e hante hadua magau' to ria tantara-na rompulu' ncobu, kana napekiri ncala', ba rakule' mpo'ewa-ra ba uma-di."
        },
        {
            "chapter": 14,
            "verse": 32,
            "name": "Luke 14:32",
            "text": "Ane na'inca ka'uma-na mpai' hompe tantara-na, molaa-pidi bali' -na, nahubui-mi suro hilou mpali' kahintuwuaa'.\""
        },
        {
            "chapter": 14,
            "verse": 33,
            "name": "Luke 14:33",
            "text": "Yesus mpokaliliu lolita-na, na'uli': \"Wae wo'o koi', ane uma-koi mpobahaka hawe'ea to ria hi koi', uma-koi ma'ala jadi' topetuku' -ku."
        },
        {
            "chapter": 14,
            "verse": 34,
            "name": "Luke 14:34",
            "text": "\"Poi', wori' kalaua-na. Aga ane mobali' -mi kapoi' -na alaa-na uma-pi mopoi', napa tena to ma'ala mpakapoi' -i?"
        },
        {
            "chapter": 14,
            "verse": 35,
            "name": "Luke 14:35",
            "text": "Uma ntoto-pi ria tuju-na, ba raruduhi-ki hinu'a ba rapopai-pai. Agina ratadi lau-imi. Hema-koi to tilingaa, pe'epei lompe'!\""
        }
    ]
}