{
    "translation": "Tausug Kitab Injil",
    "abbreviation": "tausug",
    "lang": "tsg",
    "language": "Tausug",
    "direction": "LTR",
    "encoding": "UTF-8",
    "book_nr": 50,
    "book_name": "Philippians",
    "chapter": 1,
    "name": "Philippians 1",
    "verses": [
        {
            "chapter": 1,
            "verse": 1,
            "name": "Philippians 1:1",
            "text": "  In sulat ini naug dayn k\u0101ku', hi Paul, iban sin iban ku hi Timuti. In kami ini karuwa \u012bpun hi \u012asa Almasi.  Hipasampay namu' in sulat ini mawn kaniyu kat\u0101n, manga suku' sin Tuhan nagparachaya kan \u012asa Almasi, duun ha hula' Pilipi, sampay da isab pa manga nakura' niyu iban sin manga kaibanan Almasihin timatabang sin manga hinang duun ha lawman niyu manga jamaa Almasihin."
        },
        {
            "chapter": 1,
            "verse": 2,
            "name": "Philippians 1:2",
            "text": " Mura-murahan bang mayan kamu dihilan sin Tuhan, Ama' natu', iban Panghu' natu' \u012asa Almasi, tulung-tabang iban kasannyangan sin lawm atay niyu."
        },
        {
            "chapter": 1,
            "verse": 3,
            "name": "Philippians 1:3",
            "text": "  Magsarang-sukul aku pa Tuhan, amu in paghulas-sangsaan ku, ha pasal niyu sakahaba' waktu katumtuman ta kamu."
        },
        {
            "chapter": 1,
            "verse": 4,
            "name": "Philippians 1:4",
            "text": "Iban makuyag in atay ku ha sakahaba' waktu masabbut ta kamu bang aku mangarap pa Tuhan ha pasal niyu."
        },
        {
            "chapter": 1,
            "verse": 5,
            "name": "Philippians 1:5",
            "text": "Iban hangkan aku makuyag, pasal katumtuman ku in kaagi niyu nagtabang k\u0101ku' nagpasaplag sin Bayta' Marayaw ha pasal hi \u012asa Almasi. L\u0101gi' in pagtabang niyu k\u0101ku' dayn ha waktu pa sin tagna' niyu nagparachaya kan \u012asa sampay pa bihaun."
        },
        {
            "chapter": 1,
            "verse": 6,
            "name": "Philippians 1:6",
            "text": "Iban natatantu ku tuud sin in hinang marayaw, amu in iyukkil sin Tuhan duun ha pamikil niyu, di' niya tuud bugtuun sampay pa adlaw pagbalik hi \u012asa Almasi mari pa dunya. G\u0101m mayan talusun niya ha waktu sin pagbalik hi \u012asa."
        },
        {
            "chapter": 1,
            "verse": 7,
            "name": "Philippians 1:7",
            "text": " In kamu tattap ha lawm atay ku, hangkan patut da tuud kamu tumtumun ku, pasal in kamu yan awn lamud niyu ha kat\u0101n hinang kiyatukbal k\u0101ku' sin Tuhan. Timabang tuud kamu k\u0101ku' minsan aku yari najij\u012bl, iban sin ha waktu ku namawgbug sin kasabunnalan, amu in kapagsambung-laung ku iban sin manga tau simulang sin Bayta' Marayaw pasal hi \u012asa, iban da isab ha waktu ku nagpamahalayak sin Bayta' Marayaw."
        },
        {
            "chapter": 1,
            "verse": 8,
            "name": "Philippians 1:8",
            "text": "Tuhan da in makaingat sin bunnal tuud in landu' sin tumtum ku kaniyu kat\u0101n. Karna' in lasa ku kaniyu biya' da sin lasa hi \u012asa Almasi kaniyu."
        },
        {
            "chapter": 1,
            "verse": 9,
            "name": "Philippians 1:9",
            "text": " Pangayuun ku duwaa pa Tuhan bang mayan sum\u016bng in kasi-lasa niyu ha pagkahi niyu. Damikkiyan bang mayan isab sum\u016bng da in ingat niyu pasal pa Tuhan iban sin pagsilang niyu sin mang\u012b' iban marayaw,"
        },
        {
            "chapter": 1,
            "verse": 10,
            "name": "Philippians 1:10",
            "text": "ha supaya niyu kaingatan (iban mahinang) bang unu tuud in marayaw. Na, amuna yan in makatabang kaniyu, ha supaya ha adlaw pagbalik sin Almasi mari pa dunya, malanu' in atay niyu. Wayruun tamak-tawktuk kab\u0101kan niya duun kaniyu."
        },
        {
            "chapter": 1,
            "verse": 11,
            "name": "Philippians 1:11",
            "text": "L\u0101gi' tattap da kamu huminang sin unu-unu marayaw iban mabuntul kaagi sin tabang hi \u012asa Almasi kaniyu, ha supaya pudjihun sin tau iban sanglitun sin tau in Tuhan."
        },
        {
            "chapter": 1,
            "verse": 12,
            "name": "Philippians 1:12",
            "text": "  Manga taymanghud ku, mabaya' ku hipaingat kaniyu sin marayaw sadja in guwaan sin unu-unu kat\u0101n pakaradjaan kimugdan k\u0101ku', sabab nakatabang k\u0101ku' nagpasaplag sin Bayta' Marayaw."
        },
        {
            "chapter": 1,
            "verse": 13,
            "name": "Philippians 1:13",
            "text": "Minsan in manga sundalu amu in nagjajaga sin astana' sin sultan, in sila kat\u0101n iban na sin kaibanan tau d\u012b, kaingatan nila sin in aku naj\u012bl pasal sin pagbawgbug ku ha Almasi."
        },
        {
            "chapter": 1,
            "verse": 14,
            "name": "Philippians 1:14",
            "text": "Iban kiyarayaw da isab in pagj\u012bl k\u0101ku' pasal nakarihil kusug ha pangandul sin kamatauran sin manga taymanghud natu' ha Panghu', hangkan sim\u016bng na in tawakkal nila iban nalawa' in buga' nila magnas\u012bhat sin Parman sin Tuhan."
        },
        {
            "chapter": 1,
            "verse": 15,
            "name": "Philippians 1:15",
            "text": " Bunnal awn kaibanan manga Almasihin, mang\u012b' in maksud nila sin pagpasaplag sin panghindu' sin Almasi, pasal in sila ini maiggil k\u0101ku' iban mabaya' sila tumaas dayn k\u0101ku'. Sumagawa' in kaibanan, bang sila magpasaplag sin panghindu' sin Almasi, marayaw in maksud sin atay nila."
        },
        {
            "chapter": 1,
            "verse": 16,
            "name": "Philippians 1:16",
            "text": "Iban malasa sila k\u0101ku'. Kiyaiingatan nila sin in aku nap\u012b' sin Tuhan mamawgbug sin Bayta' Marayaw."
        },
        {
            "chapter": 1,
            "verse": 17,
            "name": "Philippians 1:17",
            "text": "Sumagawa' in kaibanan tau, amu in nasabbut ku nakauna, bukun marayaw in maksud nila nagpasampay sin panghindu' sin Almasi. Mabaya' sila dumayaw iban tumaas in hinang nila dayn k\u0101ku' pasal in pangannal nila in hinang nila makarihil iban makaruhun sin kasusahan ku d\u012b ha lawm j\u012bl."
        },
        {
            "chapter": 1,
            "verse": 18,
            "name": "Philippians 1:18",
            "text": " Malayngkan minsan biya' ha yan in hinang nila, di' da aku maghaatay. G\u0101m mayan makuyag aku sin h\u012bhinang nila, minsan da mang\u012b', atawa marayaw in maksud nila, minsan biya' diin, bang mayan in hipagnas\u012bhat nila wayruun da dugaing dayn kan \u012asa Almasi.  L\u0101gi' magsus\u016bng in kakuyagan ku"
        },
        {
            "chapter": 1,
            "verse": 19,
            "name": "Philippians 1:19",
            "text": "pasal kiyaiingatan ku sin in aku malappas da pasal sin pagpangayu' niyu k\u0101ku' duwaa pa Tuhan iban dayn ha tulung-tabang k\u0101ku' sin R\u016b sin Tuhan, amu in piyatulun k\u0101ku' hi \u012asa Almasi."
        },
        {
            "chapter": 1,
            "verse": 20,
            "name": "Philippians 1:20",
            "text": "Iban in angutun ku tuud iban huwatun ku bang mayan in hinang kiyasuku' k\u0101ku' sin Tuhan di' karapatan. Iban bang mayan di' mabugtu' in tawakkal ku magnas\u012bhat ha unu-unu waktu, awla na ha waktu bihaun. Iban di' aku maghaatay minsan aku mabuhi' atawa mapatay bang mayan karihilan ku kalagguan in Almasi, pasal asal ku siya liyalaggu' dayn sin tagna'."
        },
        {
            "chapter": 1,
            "verse": 21,
            "name": "Philippians 1:21",
            "text": "Karna' bang d\u012bhun k\u0101ku', marayaw da isab in buhi' aku, pasal mahinang ku in unu-unu kat\u0101n, amu in makarihil kalagguan ha Almasi. Sumagawa' labi pa isab marayaw bang aku mapatay."
        },
        {
            "chapter": 1,
            "verse": 22,
            "name": "Philippians 1:22",
            "text": "Malayngkan, bang mataud in mahinang ku marayaw kan \u012asa ha salugay ku buhi', na, di' ku na kaingatan bang unu tuud in marayaw p\u012bun ku, kabuhi' ka atawa kamatay."
        },
        {
            "chapter": 1,
            "verse": 23,
            "name": "Philippians 1:23",
            "text": "Na, nag'uutung-bisud in pikilan ku ini. Mabaya' na tuud aku mamutawan dayn ha dunya ini pasal amuna tuud ini in labi marayaw, karna' magt\u016by na aku kaukuman sin Almasi."
        },
        {
            "chapter": 1,
            "verse": 24,
            "name": "Philippians 1:24",
            "text": "Sumagawa' dayn ha pasal niyu, marayaw pa isab h\u0101tiku in dim\u012b na muna aku ha dunya, ha supaya aku makatabang kaniyu."
        },
        {
            "chapter": 1,
            "verse": 25,
            "name": "Philippians 1:25",
            "text": "Na, sabab sin kagunahan niyu aku, hangkan bihaun tantu na tuud in pikilan ku sin dim\u012b na muna aku kaniyu, ha supaya aku makatabang kaniyu magpas\u016bng sin pagparachaya niyu, iban makatabang dumugang sin kakuyagan niyu, amu in bunga sin pagparachaya niyu."
        },
        {
            "chapter": 1,
            "verse": 26,
            "name": "Philippians 1:26",
            "text": "Hangkan bang aku makabalik na mawn kaniyu, sum\u016bng in pagsanglit niyu kan \u012asa Almasi, sabab dayn ha pasalan sin manga nahinang niya k\u0101ku'."
        },
        {
            "chapter": 1,
            "verse": 27,
            "name": "Philippians 1:27",
            "text": " Sumagawa' in labi awla marayaw hinangun niyu bihaun, subay kamu sumangun sin palangay iban addat-tab\u012bat, amu in mat\u016bp ha manga tau amu in agad ha Bayta' Marayaw pasal sin Almasi, ha supaya makakawn na ka aku magbalik kaniyu atawa di', karungugan ku da mayan sin masi niyu giyugunggungan in \u012bman niyu. Sarta' karungugan ku da isab in kamu hangka-atay iban hangka-pikilan ha maksud niyu mamawgbug sin Bayta' Marayaw pasal sin Almasi."
        },
        {
            "chapter": 1,
            "verse": 28,
            "name": "Philippians 1:28",
            "text": "Ayaw kamu mabuga' ha manga tau simusulang kaniyu. Pataptapa niyu in atay niyu, pasal bang niyu mahinang in biya' ha ini, na amuna yan in magpakita' ha manga tau simusulang kaniyu sin masiksa' sila ha waktu sus\u016bngun. Ampa in kamu malappas dayn ha kasiksaan, pasal Tuhan in lumappas kaniyu."
        },
        {
            "chapter": 1,
            "verse": 29,
            "name": "Philippians 1:29",
            "text": "Karna' in kamu yan d\u012bhilan sin Tuhan kalagguan maghulas-sangsa' ha Almasi. Hangkan in pag'agad niyu ha Almasi bukun sadja ha magparachaya kaniya, sagawa' magad isab kamu numanam kabinsanaan dayn ha pasal niya."
        },
        {
            "chapter": 1,
            "verse": 30,
            "name": "Philippians 1:30",
            "text": "L\u0101gi', in kamu iban aku sama-sibu' limabay kabinsanaan pasal sin pagbawgbug natu' sin Almasi. Iban biya' na sin kiyarungugan niyu in kabinsanaan kimugdan k\u0101ku' sin nakalabay amu in k\u012bta' niyu, amura isab in kabinsanaan niyananam ku bihaun. "
        }
    ]
}