{
    "translation": "Tausug Kitab Injil",
    "abbreviation": "tausug",
    "lang": "tsg",
    "language": "Tausug",
    "direction": "LTR",
    "encoding": "UTF-8",
    "book_nr": 45,
    "book_name": "Romans",
    "chapter": 1,
    "name": "Romans 1",
    "verses": [
        {
            "chapter": 1,
            "verse": 1,
            "name": "Romans 1:1",
            "text": "  Sulat ini naug dayn k\u0101ku', hi Paul, hipasampay mawn kaniyu ha hula' R\u016bm. In aku ini hambuuk \u012bpun hi \u012asa Almasi iban nap\u012b' hambuuk kiyawakilan sin Tuhan magpamahalayak sin Bayta' Marayaw, naug dayn kaniya."
        },
        {
            "chapter": 1,
            "verse": 2,
            "name": "Romans 1:2",
            "text": "In Bayta' Marayaw ini, amuna in malugay na kiyajanji' sin Tuhan ha manga m\u0101nusiya'. Piyanaug niya in janji' ini pa manga nabi ampa nila siyulat biyutang ha lawm Kitab."
        },
        {
            "chapter": 1,
            "verse": 3,
            "name": "Romans 1:3",
            "text": "In Bayta' Marayaw ini pasal sin Anak Tuhan, hi \u012asa Almasi, amu in Panghu' natu'. Kaingatan ta in siya bunnal nagbaran m\u0101nusiya' sabab piyag'anak siya hambuuk panubu' hi Daud."
        },
        {
            "chapter": 1,
            "verse": 4,
            "name": "Romans 1:4",
            "text": "L\u0101gi' in siya mahasuchi sabab in siya Anak Tuhan. Dayn ha kusug sin kudarat sin Tuhan, in siya nabuhi' nagbalik dayn ha kamatay, amuna in nagpakita' sin in siya bunnal tuud Anak Tuhan."
        },
        {
            "chapter": 1,
            "verse": 5,
            "name": "Romans 1:5",
            "text": "Manjari bihaun, sabab sin lasa sin Tuhan, iban daakan niya k\u0101ku' naug dayn kan \u012asa, nahinang aku hambuuk wakil sin Tuhan. Diyaak niya aku magpamahalayak sin Bayta' Marayaw ha supaya mar\u0101 in manga tau kat\u0101n ginisan bangsa, magparachaya iban magkahagad ha Panghu' \u012asa Almasi, iban ha supaya in ng\u0101n hi \u012asa karihilan kalagguan."
        },
        {
            "chapter": 1,
            "verse": 6,
            "name": "Romans 1:6",
            "text": "Iban in kamu isab duun ha hula' R\u016bm, awn da lamud niyu, sabab nap\u012b' kamu sin Tuhan mahinang suku' hi \u012asa Almasi."
        },
        {
            "chapter": 1,
            "verse": 7,
            "name": "Romans 1:7",
            "text": " Na, hangkan yan aku nagsulat pa kaniyu kat\u0101n duun ha hula' R\u016bm. In kamu yan kalasahan sin Tuhan iban nap\u012b' niya kamu mahinang tau suku' niya.  Mura-murahan bang mayan kamu dihilan tulung-tabang iban kasannyangan kaagi sin Ama' natu' Tuhan iban sin Panghu' \u012asa Almasi."
        },
        {
            "chapter": 1,
            "verse": 8,
            "name": "Romans 1:8",
            "text": "  Muna-muna mabaya' ku hipaingat kaniyu sin magsarang-sukul tuud aku pa Tuhan pasal niyu. Sabab natanyag ha katilingkal dunya in pangandul niyu kan \u012asa Almasi. In pagsarang-sukul ku pa Tuhan tiyayma' niya pasal hi \u012asa Almasi."
        },
        {
            "chapter": 1,
            "verse": 9,
            "name": "Romans 1:9",
            "text": "In Tuhan amu in piyagtag'\u012bpunan ku, ihilas sin atay kaagi sin pagpamahalayak ku sin Bayta' Marayaw pasal sin Anak niya, amuna siya in saksi' sin in manga bichara ku bunnal. Kiyaiingatan sin Tuhan sin sakahaba' aku mangayu' duwaa, piyapangayuan ta sadja kamu duwaa pa marayaw."
        },
        {
            "chapter": 1,
            "verse": 10,
            "name": "Romans 1:10",
            "text": "Iban piyapangayu' ku pa Tuhan bang mayan dayn ha k\u016bg-baya' niya d\u016blan niya na aku mamisita mawn kaniyu, amu in malugay ku na kabayaan hinangun."
        },
        {
            "chapter": 1,
            "verse": 11,
            "name": "Romans 1:11",
            "text": " Mabaya' tuud aku dum\u0101 magkita' kaniyu, sabab mabaya' ku hihindu' kaniyu in tulung-tabang sin R\u016b sin Tuhan, amu in makatabang magpahugut sin \u012bman niyu ha Tuhan."
        },
        {
            "chapter": 1,
            "verse": 12,
            "name": "Romans 1:12",
            "text": "In h\u0101tihan niya hangkan aku mabaya' mawn kaniyu, ha supaya kitaniyu makapagtabang-tiyabangi. Lumasig in atay niyu bang niyu kakitaan in hugut sin \u012bman ku. Damikkiyan, lumasig da isab in atay ku bang ku kakitaan in hugut sin \u012bman niyu."
        },
        {
            "chapter": 1,
            "verse": 13,
            "name": "Romans 1:13",
            "text": " Manga taymanghud ku agad kan \u012asa, mabaya' ku tuud hipaingat kaniyu sin nakamataud na aku nagbanu-banu mamisita mawn kaniyu, sumagawa' awn nakaalal sin panaw ku. Mabaya' tuud aku mawn kaniyu magnas\u012bhat, ha supaya awn duun kaniyu mar\u0101 ku magparachaya kan \u012asa Almasi biya' da isab sin manga kaibanan tau bukun bangsa Yahudi, amu in nar\u0101 ku nagparachaya ha Almasi."
        },
        {
            "chapter": 1,
            "verse": 14,
            "name": "Romans 1:14",
            "text": "Karna' awn hinang kiyawajib k\u0101ku' magnas\u012bhat pa tau kat\u0101n minsan unu in bangsa, sibu' da tagapangadji' iban way."
        },
        {
            "chapter": 1,
            "verse": 15,
            "name": "Romans 1:15",
            "text": "Na, hangkan landu' tuud isab in baya' ku magnas\u012bhat sin Bayta' Marayaw pa kaniyu duun naghuhula' ha R\u016bm."
        },
        {
            "chapter": 1,
            "verse": 16,
            "name": "Romans 1:16",
            "text": " Manjari, di' ku hikasipug in Bayta' Marayaw, sabab dayn ha kusug sin kudarat sin Tuhan hisiyu-siyu in magparachaya ha Bayta' Marayaw malappas dayn ha dusa iban dayn ha kasiksaan tungbas niya. In Bayta' Marayaw ini piyamahalayak muna pa manga Yahudi, sumagawa' bihaun piyamahalayak na pa manga tau kat\u0101n."
        },
        {
            "chapter": 1,
            "verse": 17,
            "name": "Romans 1:17",
            "text": "In Bayta' Marayaw, amu in magpah\u0101ti bang biya' diin sin Tuhan itungun way dusa in m\u0101nusiya'. Subay in manga m\u0101nusiya' mangandul ha Tuhan. Wayruun d\u0101n dugaing pa kabuntulan ha pangita' sin Tuhan dayn ha tagna' sampay pa kahinapusan. Biya' na sin Parman kiyasulat ha lawm Kitab, amu agi, \u201cIn tau itungun sin Tuhan tau mabuntul, iban amu in makab\u0101k kabuhi' salama-lama, amuna in tau mahugut in pangandul nila pa Tuhan.\u201d"
        },
        {
            "chapter": 1,
            "verse": 18,
            "name": "Romans 1:18",
            "text": "  In Tuhan piyakita' niya na sin in siya marugal pasal sin kat\u0101n dusa nahinang sin manga tau iban pasal way buga' nila kaniya. Hangkan piyanaugan sila murka' dayn ha surga', sabab dayn ha pasal sin hinang nila mang\u012b', siyulak nila iban tiyabunan nila in hindu' kasabunnalan pasal Tuhan."
        },
        {
            "chapter": 1,
            "verse": 19,
            "name": "Romans 1:19",
            "text": "Siksaun sila sin Tuhan sabab minsan matampal na tuud kanila in kasabunnalan pasal sin Tuhan, amu in maabut sin pikilan sin tau, masi-masi da sila di' magkahagad, malayngkan Tuhan in nagbutang pangingat pa lawm pamikil iban atay sin manga m\u0101nusiya' sin pasal niya."
        },
        {
            "chapter": 1,
            "verse": 20,
            "name": "Romans 1:20",
            "text": "Bunnal sa yan, di' ta kakitaan in manga sipat sin Tuhan bang biya' diin. Di' ta kakitaan in kudarat niya amu in way katapusan, iban di' ta kakitaan in j\u0101t niya. Sumagawa' in manga yan matampal tuud dayn ha tagna' pa sin waktu kapapanjari sin Tuhan sin dunya, sabab in manga sipat sin Tuhan kakitaan sin manga m\u0101nusiya' dayn ha unu-unu kat\u0101n piyapanjari niya. Hangkan, wayruun hikadaawa nila sin di' nila kaingatan in Tuhan."
        },
        {
            "chapter": 1,
            "verse": 21,
            "name": "Romans 1:21",
            "text": " Marayaw in pangingat nila ha pasal sin Tuhan. Kaingatan nila sin subay nila siya lagguun sabab Tuhan siya. Sumagawa' wala' nila liyaggu' in Tuhan. Di' sila minsan magsukul kaniya. G\u0101m mayan in pamikil nila nahipu' sin unu-unu kat\u0101n karupangan. Biya' sin hantang ha lawm katigidluman in pamikil nila, hangkan di' nila kah\u0101tihan in kasabunnalan pasal sin Tuhan."
        },
        {
            "chapter": 1,
            "verse": 22,
            "name": "Romans 1:22",
            "text": "Laung nila in sila halul-akkal, sagawa' in kasabunnalan niya in sila dupang."
        },
        {
            "chapter": 1,
            "verse": 23,
            "name": "Romans 1:23",
            "text": "Sabab in pagsumbahun nila, bukun amu in asal Tuhan di' magkamatay saumul. Sagawa' in piyagsumba nila yan amuna in manga barhala' h\u012bnang piyasalupa biya' tau, amu in tau piyasalupahan nila ha barhala' magkamatay da. Iban piyagsumba nila da isab in manga biya' dagbus manuk-manuk, iban hayup, upat in siki, iban manga sattuwa magpananap ha lupa'."
        },
        {
            "chapter": 1,
            "verse": 24,
            "name": "Romans 1:24",
            "text": " Na, pagga in manga m\u0101nusiya' dupang, piyas\u0101ran sila sin Tuhan maghinang sin unu-unu kalumuan kabayaan nila. Maghinang sila sin makasipug, sin di' mapatut iban sin pagkahi nila."
        },
        {
            "chapter": 1,
            "verse": 25,
            "name": "Romans 1:25",
            "text": "Di' sila magkahagad sin kasabunnalan pasal sin Tuhan, sagawa' amu in kahagarun nila in bukun bunnal. In Tuhan, amuna in nagpapanjari sin unu-unu kat\u0101n, sagawa' bukun siya in siyumba nila. G\u0101m mayan in siyumba iban piyagtag'\u012bpunan nila, in manga piyapanjari sin Tuhan. In Tuhan subay amu in pudjihun nila kasaumulan. Amin."
        },
        {
            "chapter": 1,
            "verse": 26,
            "name": "Romans 1:26",
            "text": " Na, pagga biya' ha yan in hinang sin manga m\u0101nusiya', piyas\u0101ran na sila sin Tuhan magd\u016bl sin unu-unu hawa-napsu nila mang\u012b', amu in makasipug tuud. Minsan in manga babai limanggal na sin atulan asal kiyamaksud sin pagkababai nila. Naghinang sila sin di' mapatut iban sin pagkahi nila babai."
        },
        {
            "chapter": 1,
            "verse": 27,
            "name": "Romans 1:27",
            "text": "Damikkiyan da in manga usug, wayruun napsu nila ha manga babai, sagawa' nagtubud in napsu nila ha manga pagkahi nila usug. Naghinang sila sin makasipug iban sin pagkahi nila usug. Na, in tungbas niya piyagkananaman nila ha baran nila in hukuman biyutang kanila sin Tuhan, amu in tim\u016bp tuud ha dusa nila yan."
        },
        {
            "chapter": 1,
            "verse": 28,
            "name": "Romans 1:28",
            "text": " Na, pagga wala' hiyaatay sin manga tau in Tuhan, piyas\u0101ran na sila sin Tuhan magpikil sin unu-unu mang\u012b'. Hangkan makahinang na sila sin manga kang\u012ban, amu in bukun mapatut hinangun nila."
        },
        {
            "chapter": 1,
            "verse": 29,
            "name": "Romans 1:29",
            "text": "In pamikil iban atay nila hipu' sin ginisan kang\u012ban. In p\u012bpikil nila sadja amu in maghinang mang\u012b' iban maghawa-napsu. Mabunsi sadja sila iban nangangabughu' sadja sila ha pagkahi nila. Mabaya' sadja sila magk\u0101lu iban mamunu'. Mangakkal sadja sila ha pagkahi nila iban mang\u012b' sadja in pikilan nila tudju pa pagkahi nila. Magd\u0101-r\u0101 sadja sila bichara dayn ha hambuuk pa hambuuk."
        },
        {
            "chapter": 1,
            "verse": 30,
            "name": "Romans 1:30",
            "text": "In sila manglilimut ha pagkahi nila. Marugal sila ha Tuhan. Biyababa' nila in pagkahi nila. Mataas in pagd\u0101 nila sin baran nila iban maabbu sila. Landu' sila tuud mapanday magpikil himinang sin kang\u012ban. Di' sila magkahagad ha manga maas nila."
        },
        {
            "chapter": 1,
            "verse": 31,
            "name": "Romans 1:31",
            "text": "In sila manga tau dupang. Di' nila kah\u0101tihan in kasabunnalan pasal sin Tuhan. Di' nila pag'agarun in manga janji' nila, iban di' sila malasa iban maluuy ha pagkahi nila."
        },
        {
            "chapter": 1,
            "verse": 32,
            "name": "Romans 1:32",
            "text": "Asal mahantap in pangh\u0101ti nila sin sara' sin Tuhan, amu in laung na, hisiyu-siyu in tau huminang sin manga dusa nasabbut yan, t\u016bpun sila siksaun ha lawm sin narka'. Sagawa' masi-masi da sila himihinang sin biya' ha yan, iban k\u016bgan isab sila bang in kaibanan maghinang sin biya' ha yan. "
        }
    ]
}