{
    "translation": "Bible in Pohnpeian language",
    "abbreviation": "pohnpeian",
    "lang": "pon",
    "language": "Pohnpeian",
    "direction": "LTR",
    "encoding": "UTF-8",
    "book_nr": 42,
    "book_name": "Luke",
    "chapter": 10,
    "name": "Luke 10",
    "verses": [
        {
            "chapter": 10,
            "verse": 1,
            "name": "Luke 10:1",
            "text": "    Mwurin mepwukat Kaun-o ketin pilada tohnpadahk isiakan riemen oh ketin poaronepeseng mwowe, wad riemen, pwe re en kolahng nan kahnimw kan oh wasa kan me e pahn ketilahng ie."
        },
        {
            "chapter": 10,
            "verse": 2,
            "name": "Luke 10:2",
            "text": "Ih eri ketin mahsanihong irail, \u201cRahket me inenen laud, a tohndoadoahk kan me malaulau; kumwail eri kapakap oh peki rehn kaunen rahket pwe en ketin kadarodohng tohndoadoahk tohto nan sapwellime rahk. "
        },
        {
            "chapter": 10,
            "verse": 3,
            "name": "Luke 10:3",
            "text": "Eri, kumwail mwesel; kumwail en ese pwe I kadarkumwailwei duwehte sihmpwul kei nanpwungen kidien wel kan. "
        },
        {
            "chapter": 10,
            "verse": 4,
            "name": "Luke 10:4",
            "text": "Kumwail dehr wa pilihs, de koaruk en seiloak, de suht. Kumwail dehr uhdi nanial akan pwehn rahnmwahwih aramas."
        },
        {
            "chapter": 10,
            "verse": 5,
            "name": "Luke 10:5",
            "text": "Ni amwail pahn kin lel ni kahnimw ehu, kumwail pahn kin nda, \u2018Popohl ong tehnpas wet.\u2019"
        },
        {
            "chapter": 10,
            "verse": 6,
            "name": "Luke 10:6",
            "text": "A ma aramas en popohl emen mie nan tehnpaso, amwail popohl pahn mihla reh; a ma sohte, e pahn pwurodohng kumwail."
        },
        {
            "chapter": 10,
            "verse": 7,
            "name": "Luke 10:7",
            "text": "Kumwail eri mihmihte nan ihmwo, iang tungutungoale mehkoaros me re pahn kaunopada mwohmwail; pwe tohndoadoahk koaros kin konehng ale pweinen ar doadoahk. Kumwail dehr kin kesekeseuseli kohsang ni ehu ihmw kolahng ni ehu. "
        },
        {
            "chapter": 10,
            "verse": 8,
            "name": "Luke 10:8",
            "text": "Ma kumwail pahn pedolong nan kahnimw ehu oh re ahpw kasamwo kumwail, kumwail tungoale kisin tungoal akan me re pahn kihong kumwail."
        },
        {
            "chapter": 10,
            "verse": 9,
            "name": "Luke 10:9",
            "text": "Kumwail kakehlahda me soumwahu kan en nan kahnimwo, oh kapahrengkihong towe kan me Wehin Koht kerendohngirailehr!"
        },
        {
            "chapter": 10,
            "verse": 10,
            "name": "Luke 10:10",
            "text": "A ma kumwail pedolong nan kahnimw ehu oh re sohte men kasamwo kumwail, kumwail kohieilahng nanial kan oh ndaiong towe kan, "
        },
        {
            "chapter": 10,
            "verse": 11,
            "name": "Luke 10:11",
            "text": "\u201cPwelpar en amwail kahnimw me pasehngehr nin neht kat, se sipedowohng kumwail pwehki at men kasalehda at sapwungkin kumwail; ahpw kumwail en ese pwe Wehin Koht kerendohngkumwailehr.\u2019 "
        },
        {
            "chapter": 10,
            "verse": 12,
            "name": "Luke 10:12",
            "text": "Mehlel I ndaiong kumwail pwe ni Rahnen Kadeiko Sodom pahn diar kalahngan en Koht laudsang kahnimwo!\u201d    "
        },
        {
            "chapter": 10,
            "verse": 13,
            "name": "Luke 10:13",
            "text": "     \u201cMeid suwediong uhk, Korasin! Pil meid suwediong uhk, Pedsaida! Pwe ma manaman ako me wiawiher rehmwa, re pweidahte rehn Dair oh Saidon, nahn tohn kahnimw pwukat mwomwohdehr nan likoun nsensuwed, oh kamwerehdiong pehs pohrail, kasalepen ar koluhla oh wiliakapwala. "
        },
        {
            "chapter": 10,
            "verse": 14,
            "name": "Luke 10:14",
            "text": "Ni Rahnen Kadeiko Dair oh Saidon pahn diar kalahngan rehn Koht laudsang me kumwa pahn diar."
        },
        {
            "chapter": 10,
            "verse": 15,
            "name": "Luke 10:15",
            "text": "A duwen kowe, Kapernaum, kowe me pein pwekuhkadalahng nanleng? Ke pahn pisikendilahng nan ehl!\u201d   "
        },
        {
            "chapter": 10,
            "verse": 16,
            "name": "Luke 10:16",
            "text": "  Sises ahpw pil mahsanihong tohnpadahk ko, \u201cMe kin rong kumwail, nahn e kin rong ie; a me kin mwamwahlkin kumwail, nahn e kin mwamwahlkin ie, a me kin mwamwahlkin ie, nahn e kin mwahmwahlki me ketin kadariehdo.\u201d    "
        },
        {
            "chapter": 10,
            "verse": 17,
            "name": "Luke 10:17",
            "text": "    Tohnpadahk isiakan riemeno ahpw pwurodo, pereperen kowahlap. Re ahpw patohwanohng Sises, \u201cMaing at Kaun, ngehn suwed kan pil kin peikiong kiht ni at kin kausirailsang rehn aramas ni roson en mwaromwi!\u201d"
        },
        {
            "chapter": 10,
            "verse": 18,
            "name": "Luke 10:18",
            "text": "A Sises ketin sapeng irail, mahsanih, \u201cI kilangehr duwen Sehdan eh pwupwudisang nanleng duwehte lioal.  "
        },
        {
            "chapter": 10,
            "verse": 19,
            "name": "Luke 10:19",
            "text": "  Kumwail en ese pwe I kihong kumwail manaman, pwe kumwail en kak sok pohn sineik kan oh pohn skorpion kan oh powehdi Imwintihtio, oh sohte mehkot pahn kauweikumwailla. "
        },
        {
            "chapter": 10,
            "verse": 20,
            "name": "Luke 10:20",
            "text": "Eri, kumwail dehr perenki en ngehn saut kan ar peikiong kumwail, ahpw kumwail en perenkihda adamwail kan eh ntingdier nanleng.\u201d   "
        },
        {
            "chapter": 10,
            "verse": 21,
            "name": "Luke 10:21",
            "text": "     Ni ahnsowohte Sises ketin direkihla peren laud en nan kupwure sang rehn Ngehn Sarawi. Ih eri mahsanih, \u201cMaing Semei, Kaun en nanleng oh sampah! I kapingahkin komwi omwi ketin ekihsang soahng pwukat me loalokong oh koahiek en sampah kan, ahpw ketin kasalehiong me soaloalokong kan. Iei Maing, Semei, met komw ketin wiahda sang ni pein mwekid en nan kupwuromwi.  "
        },
        {
            "chapter": 10,
            "verse": 22,
            "name": "Luke 10:22",
            "text": "  \u201cSemei ketikihongieier mehkoaros. Sohte emen ese duwen Sapwellimen Kohto, pwe Sahmohte me mwahngih. Pil sohte emen ese duwen Sahm, pwe Sapwellimen Kohtohte, oh irail kan me Sapwellimen Kohto ketin kupwurki en kasalehiong.\u201d   "
        },
        {
            "chapter": 10,
            "verse": 23,
            "name": "Luke 10:23",
            "text": "  Sises ahpw ketin sohpeiong tohnpadahk ko oh mahsanihong irail ni rir, \u201cMeid pai kumwail me uduhdiahlehr mehkan me kumwail uduhdiahl met!"
        },
        {
            "chapter": 10,
            "verse": 24,
            "name": "Luke 10:24",
            "text": "Kumwail en ese pwe soukohp tohto oh nanmwarki tohto ngoangkilahr en udiahl mehkan me kumwail uduhdiahl met, re ahpw sohte kak; re pil men iang rong mehkan me kumwail rongorong met, re ahpw sohte kak.\u201d   "
        },
        {
            "chapter": 10,
            "verse": 25,
            "name": "Luke 10:25",
            "text": "    Eri, sounpadahk en Kosonnedo men ahpw pwarodo rehn Sises oh song en lidipih, patohwanohng, \u201cSounpadahk, dahme I uhdahn pahn wia pwe I en kak ale mour soutuk?\u201d   "
        },
        {
            "chapter": 10,
            "verse": 26,
            "name": "Luke 10:26",
            "text": "  A Sises ketin sapeng, mahsanih, \u201cDahme ntinting nan Pwuhk Sarawi? Dahme Pwuhk Sarawi mahsanih?\u201d  "
        },
        {
            "chapter": 10,
            "verse": 27,
            "name": "Luke 10:27",
            "text": "  A ohlo patohwanohng, \u201cKe en poakohng Kaun-o, omw Koht, sang nan kapehdomw unsek, ni ngenomw unsek, ni omw kehl koaros unsek, ni loalomw unsek;\u2019 oh \u2018Ke en poakohng mehn mpomw duwen omw kin poakohng pein uhk.\u2019 \u201d   "
        },
        {
            "chapter": 10,
            "verse": 28,
            "name": "Luke 10:28",
            "text": "  Sises ketin sapeng, mahsanih, \u201cMe pwung omw pasapengen. Eri, kapwaiada men, ke ahpw pahn mourla.\u201d   "
        },
        {
            "chapter": 10,
            "verse": 29,
            "name": "Luke 10:29",
            "text": "  A ohlo, me men akupwungki pein ih, idek rehn Sises, patohwan, \u201cA ihs me mehn mpei?\u201d  "
        },
        {
            "chapter": 10,
            "verse": 30,
            "name": "Luke 10:30",
            "text": "  Sises ketin sapeng, mahsanih, \u201cAramas emen kohdihla sang Serusalem kohdilahng Seriko; loallap suwed kei ahpw poarokedi, kulihasang eh likou kan, kemeselihte lao kalipwelipwehda kereniong mehla, re ahpw kohkohlahsang."
        },
        {
            "chapter": 10,
            "verse": 31,
            "name": "Luke 10:31",
            "text": "Samworo men ahpw keididihla nanialohte; ni eh kilangada aramaso, e douluhllahsang keid apali ahlo."
        },
        {
            "chapter": 10,
            "verse": 32,
            "name": "Luke 10:32",
            "text": "Pil duwehte mehn Lipai men keid wasao, kilangada ohlo, e ahpw pil douluhllahsang keid apali ahlo."
        },
        {
            "chapter": 10,
            "verse": 33,
            "name": "Luke 10:33",
            "text": "A ohlen Sameria men me wiewia eh seiloak oh pil keid wasao, ni eh kilangada aramaso, nan kapehde mwekidikihda eh poakehla. "
        },
        {
            "chapter": 10,
            "verse": 34,
            "name": "Luke 10:34",
            "text": "E ahpw keiong mpe, kieldiong leh oh wain pohn wasa ohla kan en paliwere oh kidimpene. E ahpw kidahng pohn dakepe oh walahng nan imwen keiru ehu; e ahpw apwahpwalih wasao."
        },
        {
            "chapter": 10,
            "verse": 35,
            "name": "Luke 10:35",
            "text": "A mandahn rahno e ahpw kihong mwohni silper riau kaunen imwen keiruwo oh ndaiong, \u2018Apwalih mahs ohl menet, oh ni ei pahn pwurodo I nek kapwungohng uhk mehkoaros me ke pahn luhskihla.\u2019 \u201d  "
        },
        {
            "chapter": 10,
            "verse": 36,
            "name": "Luke 10:36",
            "text": "  Sises eri kaimwisekala karasaras wet, mahsanihalahng sounpadahko, \u201cIhs me ke lemehiong rehn me silimen pwukat, me uhdahn mehn mpen aramas me lohdiong loallap suwed ko?\u201d  "
        },
        {
            "chapter": 10,
            "verse": 37,
            "name": "Luke 10:37",
            "text": "  A e sapeng, patohwan, \u201cMe patohwan kadek ong iho.\u201d   Sises ketin mahsanihong, \u201cEri, kohwei oh wiahda duwehte.\u201d   "
        },
        {
            "chapter": 10,
            "verse": 38,
            "name": "Luke 10:38",
            "text": "    Ni Sises oh sapwellime tohnpadahk ko ar ketiket kohdalahng Serusalem, re ahpw lel ni kisin kahnimw kis wasa me lih emen, ede Marda, kasamwolong Sises nan imwe pwe en wiahiong kisin einpwoat kis. "
        },
        {
            "chapter": 10,
            "verse": 39,
            "name": "Luke 10:39",
            "text": "Rien Marda lih emen mie, ede Mery, me mwohndiongete mpen aluweluwen Sises ko oh mwomwohdete wasao, rongorong sapwellime mahsen kan."
        },
        {
            "chapter": 10,
            "verse": 40,
            "name": "Luke 10:40",
            "text": "A Marda ahpw kin pwurupwurkiseli eh kedirepw en onopada mehkoaros mehn papah Sises. Ih eri keiong mpen Sises oh patohwanohng, \u201cMaing, komw mahsanih mahs duwen Mery eh sohte men sewese ie ni kisin doadoahk kiset. Ngehi eri kelehpwkilahr. Komw mahsanihong en sewese ie mahs!\u201d  "
        },
        {
            "chapter": 10,
            "verse": 41,
            "name": "Luke 10:41",
            "text": "  Sises ahpw sapeng, mahsanih, \u201cMarda, Marda! Ke pwunodkidahr oh soupisengkilahr soahng tohto."
        },
        {
            "chapter": 10,
            "verse": 42,
            "name": "Luke 10:42",
            "text": "A ke en ese pwe soahng teieu me kesempwal kowalahpie. Mery piladahr mehkot mwahwie; eri, sohte me pahn adihasang.\u201d    "
        }
    ]
}