{
    "translation": "Manx Gaelic (Esther Jonah 4 Gospels)",
    "abbreviation": "manxgaelic",
    "lang": "gv",
    "language": "Manx Gaelic",
    "direction": "LTR",
    "encoding": "",
    "book_nr": 32,
    "book_name": "Jonah",
    "chapter": 1,
    "name": "Jonah 1",
    "verses": [
        {
            "chapter": 1,
            "verse": 1,
            "name": "Jonah 1:1",
            "text": "Nish haink goo yn Chiarn gys Jonah mac Amittai gra,"
        },
        {
            "chapter": 1,
            "verse": 2,
            "name": "Jonah 1:2",
            "text": "Trog ort, immee gys Nineveh yn ard valley mooar shen, as trog seose dty choraa noi eck, son ta'n mee chraueeaght oc er jeet seose kiongoyrt rhym."
        },
        {
            "chapter": 1,
            "verse": 3,
            "name": "Jonah 1:3",
            "text": "Agh dirree Jonah seose dy roie er-chea gys Tarshish veih fenish y Chiarn, as hie eh sheese gys Joppa; as hooar eh lhong goll gys Tarshish: myr shen deeck eh yn leagh-shiaullee, as hie eh er boayrd, dy gholl maroo gys Tarshish, veih fenish y Chiarn."
        },
        {
            "chapter": 1,
            "verse": 4,
            "name": "Jonah 1:4",
            "text": "Agh hug y Chiarn magh geay vooar er yn aarkey, as va sterrym dorrinagh ayns y cheayn, myr shen dy row yn lhong ayns gaue brishey."
        },
        {
            "chapter": 1,
            "verse": 5,
            "name": "Jonah 1:5",
            "text": "Eisht va aggle er ny marrinee, as deie ad dagh dooinney gys e yee, as hilg ad magh yn chooid v'er boayrd 'sy cheayn, dy eddrymaghey yn lhong: agh va Jonah ersooyl sheese 'sy chabbane, as lhie eh, as v'eh trome ny chadley."
        },
        {
            "chapter": 1,
            "verse": 6,
            "name": "Jonah 1:6",
            "text": "Myr shen haink mainshtyr y lhong huggey, as dooyrt eh rish, Kys t'ou cadley myr shoh, y chadlag? irree, eie er dty Yee, my she shen dy jean Jee smooinaghtyn orrin, nagh bee mayd caillit."
        },
        {
            "chapter": 1,
            "verse": 7,
            "name": "Jonah 1:7",
            "text": "As dooyrt ad, dagh fer rish e heshey, Tar-jee, as lhig dooin lottyn y hayrn, dy vod fys y ve ain, quoi by-chyndagh ta'n olk shoh er jeet orrin. Myr shen hilg ad lottyn, as huitt y lot er Jonah."
        },
        {
            "chapter": 1,
            "verse": 8,
            "name": "Jonah 1:8",
            "text": "Eisht dooyrt ad rish, Insh dooin, ta shin guee ort, quoi by-chyndagh ta'n olk shoh er jeet orrin: cre ta dty aght beaghee? as cre voish t'ou? cre'n cheer t'ou jeh? as cre'n sleih t'ou jeh?"
        },
        {
            "chapter": 1,
            "verse": 9,
            "name": "Jonah 1:9",
            "text": "As dooyrt eh roo, She Hebrew mee, as ta mee goaill aggle roish y Chiarn, Jee ny flaunys, t'er chroo yn aarkey as y thalloo chirrym."
        },
        {
            "chapter": 1,
            "verse": 10,
            "name": "Jonah 1:10",
            "text": "Eisht va ny deiney erskyn-towse agglagh, as dooyrt ad rish, Cre'n-fa t'ou uss er n'yannoo shoh? (son va fys ec ny deiney dy row eh er-chea veih fenish y Chiarn, son v'eh er n'insh daue)."
        },
        {
            "chapter": 1,
            "verse": 11,
            "name": "Jonah 1:11",
            "text": "Eisht dooyrt ad rish, Cre nee mayd rhyt, dy vod y keayn ve kiune dooin? (son va'n keayn freaney, as erskyn-towse stermagh)."
        },
        {
            "chapter": 1,
            "verse": 12,
            "name": "Jonah 1:12",
            "text": "As dooyrt eh roo, Trog-jee mee seose, as tilg-jee mee magh 'sy cheayn; myr shen vees y keayn kiune diuish: son ta fys aym dy nee by-chyndagh rhym's ta'n sterrym mooar shoh er jeet erriu."
        },
        {
            "chapter": 1,
            "verse": 13,
            "name": "Jonah 1:13",
            "text": ". Ny-yeih, ren ny deiney gymmyrt dy doccaragh, dy chosney yn thalloo, agh cha voddagh ad roshtyn, son va'n keayn freaney, as dowil-dorrinagh noi oc."
        },
        {
            "chapter": 1,
            "verse": 14,
            "name": "Jonah 1:14",
            "text": "Shen-y-fa, deie ad gys y Chiarn, as dooyrt ad, Ta shin guee ort, O Hiarn, ta shin guee ort, ny lhig dooin cherraghtyn son bioys yn dooinney shoh, as ny cur gys nyn lieh yn uill gyn-loght; son t'ou uss, O Hiarn, er n'yannoo myr s'gooidsave lhiat."
        },
        {
            "chapter": 1,
            "verse": 15,
            "name": "Jonah 1:15",
            "text": "Myr shen hrog ad seose Jonah, as hilg ad eh magh 'sy cheayn, as ghow yn aarkey kiunid veih freaney."
        },
        {
            "chapter": 1,
            "verse": 16,
            "name": "Jonah 1:16",
            "text": "Eisht ghow ny deiney aggle roish y Chiarn erskyn-towse, as ren ad breearrey dy hebbal oural da'n Chiarn."
        },
        {
            "chapter": 1,
            "verse": 17,
            "name": "Jonah 1:17",
            "text": "Nish va'n Chiarn er chiarail eeast mooar dy lhuggey seose Jonah, as va Jonah ayns bolg yn eeast, three laa as three oieghyn."
        }
    ]
}