{
    "translation": "El Evangelio segun S. Lucas, traducido al Roman\u00ed, \u00f3 dialecto de los Gitanos de Espa\u00f1a",
    "abbreviation": "calo",
    "lang": "rmq",
    "language": "Calo",
    "direction": "LTR",
    "encoding": "UTF-8",
    "book_nr": 42,
    "book_name": "Luke",
    "chapter": 24,
    "name": "Luke 24",
    "verses": [
        {
            "chapter": 24,
            "verse": 1,
            "name": "Luke 24:1",
            "text": "Y o brotoboro e dramia chal\u00e1ron muy de clarico al sepulchro, lliguerando o bue, sos terelaban quinado."
        },
        {
            "chapter": 24,
            "verse": 2,
            "name": "Luke 24:2",
            "text": "Y alach\u00e1ron a bar revueltisarada del sepulchro."
        },
        {
            "chapter": 24,
            "verse": 3,
            "name": "Luke 24:3",
            "text": "Y chalando enr\u00fan, na alach\u00e1ron o trupos e Era\u00f1or\u00f3 Jesus,"
        },
        {
            "chapter": 24,
            "verse": 4,
            "name": "Luke 24:4",
            "text": "Y anac\u00f3, que sinando perelales de dal por ocono, he acoi dui gach\u00e9s, sos se mequel\u00e1ron dicar sunparal \u00e1 siras sat coneles resplandecientes."
        },
        {
            "chapter": 24,
            "verse": 5,
            "name": "Luke 24:5",
            "text": "Y sasta sinaban medrosas, y voltisaraban a chiche ostely al chiquen, les pen\u00e1ron: \u00bfPresas orotais enrun os mules al que vivisarela?"
        },
        {
            "chapter": 24,
            "verse": 6,
            "name": "Luke 24:6",
            "text": "Na sinela acoi, presas se ha ardi\u00f1ado: ojaraos de ma pen\u00f3 \u00e1 sangue, sinando aun andr\u00e9 Galil\u00e9a,"
        },
        {
            "chapter": 24,
            "verse": 7,
            "name": "Luke 24:7",
            "text": "Penando: Jomte que o Chaboro e manu sinele entreguisarado andr\u00e9 bastes es manuces chores, y que sinele trijulado, y ardi\u00f1ele al trincho chibes."
        },
        {
            "chapter": 24,
            "verse": 8,
            "name": "Luke 24:8",
            "text": "Entonces se ojar\u00e1ron de las vardas de \u00f3."
        },
        {
            "chapter": 24,
            "verse": 9,
            "name": "Luke 24:9",
            "text": "Y chalando abr\u00ed del sepulchro, se guill\u00e1ron \u00e1 penar saro ocono \u00e1 os once, y \u00e1 sares os averes."
        },
        {
            "chapter": 24,
            "verse": 10,
            "name": "Luke 24:10",
            "text": "Y siras sos lanel\u00e1ron \u00e1 os Ap\u00f3stoles oconas buchias sinaban Maria Magdalena, y Juana, y Maria Dai de Santiago, y as averes sos sinaban sat siras."
        },
        {
            "chapter": 24,
            "verse": 11,
            "name": "Luke 24:11",
            "text": "Y junos terel\u00e1ron por chichi oconas vardas, y na las pachibel\u00e1ron."
        },
        {
            "chapter": 24,
            "verse": 12,
            "name": "Luke 24:12",
            "text": "Tami Pedro ardi\u00f1andose, se guill\u00f3 al sepulchro, y bajandose, dic\u00f3 solo \u00e1 os dicles, sos sinaban chibados ot\u00e9, y se chal\u00f3 zibando enr\u00e9 s\u00ed ma habia anacado."
        },
        {
            "chapter": 24,
            "verse": 13,
            "name": "Luke 24:13",
            "text": "Y dui de janos ocola matejo chibes, chalaban \u00e1 yeque gau araquerado Emmaus, dur de Jerusal\u00e9m sasta de zoi millas."
        },
        {
            "chapter": 24,
            "verse": 14,
            "name": "Luke 24:14",
            "text": "Y junos chal\u00e1ban chamuliando enr\u00e9 si de sarias oconas buchias sos habian anacado."
        },
        {
            "chapter": 24,
            "verse": 15,
            "name": "Luke 24:15",
            "text": "Y sasta sinaban penando y chamuliando o yeque sat o aver, bigore\u00f3 \u00e1 junos o matejo Jesus, y piraba sat junos."
        },
        {
            "chapter": 24,
            "verse": 16,
            "name": "Luke 24:16",
            "text": "Tami as aquias de junos sinaban ucharadas, somia que na le pincharasen."
        },
        {
            "chapter": 24,
            "verse": 17,
            "name": "Luke 24:17",
            "text": "Y les pen\u00f3: \u00bfQu\u00e9 vardas sinelan oconas, sos chamulais enr\u00e9 sangue pirando?\u00a0 Y presas sinelais charavares?"
        },
        {
            "chapter": 24,
            "verse": 18,
            "name": "Luke 24:18",
            "text": "Y rudelando yeque de junos, arquerado Cle\u00f3phas, le pen\u00f3: \u00bfTucue gring\u00f3 andr\u00e9 Jerusal\u00e9m: y na chanelas ma ha anacado ot\u00e9 oconas chib\u00e9ses."
        },
        {
            "chapter": 24,
            "verse": 19,
            "name": "Luke 24:19",
            "text": "O les pen\u00f3: \u00bfQue buch\u00ed?\u00a0 Y rudel\u00e1ron: De Jesus Nazareno, sos sinaba yeque gacho Propheta, siln\u00f3 andr\u00e9 obras y andr\u00e9 vardas anglal de Deb\u00e9l y de sari a sueti;"
        },
        {
            "chapter": 24,
            "verse": 20,
            "name": "Luke 24:20",
            "text": "Y sasta le entreguisar\u00e1ron os Pontesquer\u00e9s y am\u00e1res Manclayes \u00e1 condenacion de meripen, y o trijul\u00e1ron:"
        },
        {
            "chapter": 24,
            "verse": 21,
            "name": "Luke 24:21",
            "text": "Tami mu fronsaperabamos, que \u00f3 sinaba sos terelaba de di\u00f1ar mestep\u00e9 \u00e1 Israel; o mas choro sinela, que sejonia sinela o trincho chib\u00e9s, que oconas buchias han anacado."
        },
        {
            "chapter": 24,
            "verse": 22,
            "name": "Luke 24:22",
            "text": "Aunque yeques cadchias de amarias nos han querelado dara\u00f1ar; siras anglal e clarico chal\u00e1ron al sepulchro."
        },
        {
            "chapter": 24,
            "verse": 23,
            "name": "Luke 24:23",
            "text": "Y na terelando alachado desquero trupo, limbidi\u00e1ron, penando que habian dicado ot\u00e9 vision de Manfarieles, sos penelan que \u00f3 vivisarela."
        },
        {
            "chapter": 24,
            "verse": 24,
            "name": "Luke 24:24",
            "text": "Y yeques de amares plalores chal\u00e1ron al sepulchro, y lo alach\u00e1ron andiar sasta as cadchias lo habian penado; tami \u00e1 \u00f3 na lo alach\u00e1ron."
        },
        {
            "chapter": 24,
            "verse": 25,
            "name": "Luke 24:25",
            "text": "Y Jesus pen\u00f3 \u00e1 junos: \u00a1O dinel\u00e9s y tardos de carlochin, para pachibelar o saro sos os Prophetas han penado!"
        },
        {
            "chapter": 24,
            "verse": 26,
            "name": "Luke 24:26",
            "text": "\u00bfNa jomte, que o Christo urjiyase oconas buchias, y que andiar chalase enr\u00e9 desquero chimusolano?"
        },
        {
            "chapter": 24,
            "verse": 27,
            "name": "Luke 24:27",
            "text": "Y se chit\u00f3 \u00e1 penar desde Moys\u00e9s y de sar\u00e9s os Prophetas, chibando en dundun as randi\u00f1ipenes sos chamulian de \u00f3."
        },
        {
            "chapter": 24,
            "verse": 28,
            "name": "Luke 24:28",
            "text": "Y bigore\u00e1ron al gau, \u00e1 duque chalaban: Y \u00f3 di\u00f1\u00f3 simaches de chalar mas dur."
        },
        {
            "chapter": 24,
            "verse": 29,
            "name": "Luke 24:29",
            "text": "Tami o deterel\u00e1ron sat sila, penando: Queda tucue sat amangue, presas tasata sinela, y o cam ha chalado ostely.\u00a0 Y chal\u00f3 andr\u00e9 sat jun\u00f3s."
        },
        {
            "chapter": 24,
            "verse": 30,
            "name": "Luke 24:30",
            "text": "Y sinando bejelado sat junos \u00e1 la mensalli, ustil\u00f3 o tato, y o majarific\u00f3: y terelando asparabado, se lo di\u00f1aba."
        },
        {
            "chapter": 24,
            "verse": 31,
            "name": "Luke 24:31",
            "text": "Y sin\u00e1ron despandadas as aquias de jun\u00f3s, y lo pinchar\u00e1ron; y \u00f3 entonces se naj\u00f3 de desquerias aquias."
        },
        {
            "chapter": 24,
            "verse": 32,
            "name": "Luke 24:32",
            "text": "Y pen\u00e1ron yeque \u00e1 aver: \u00bfPre baji na bucharaba amaro carlochin enr\u00fan amangue, pur andr\u00e9 o drun chamuliaba sat amangue, chibando en dundun as randi\u00f1ipenes?"
        },
        {
            "chapter": 24,
            "verse": 33,
            "name": "Luke 24:33",
            "text": "Y ardi\u00f1andose andr\u00e9 a mateja oc\u00e1na, limbidi\u00e1ron \u00e1 Jerusal\u00e9m: y alach\u00e1ron catan\u00e9s \u00e1 os once, y \u00e1 junos sos sinaban sat jun\u00f3s,"
        },
        {
            "chapter": 24,
            "verse": 34,
            "name": "Luke 24:34",
            "text": "Sos pen\u00e1ron; Chachipen, ha ardi\u00f1ado o Era\u00f1\u00f3, y se ha diado \u00e1 Sim\u00f3n."
        },
        {
            "chapter": 24,
            "verse": 35,
            "name": "Luke 24:35",
            "text": "Y junos pen\u00e1ron ma les terelaba anacado andr\u00e9 o drun y sasta le habian pincherado al asparabar o tato."
        },
        {
            "chapter": 24,
            "verse": 36,
            "name": "Luke 24:36",
            "text": "Y sinando chamuliando oconas buchias, se chit\u00f3 Jesus en medio de junos, y les pen\u00f3: Paz \u00e1 sangue: menda sinelo, na dara\u00f1eleis."
        },
        {
            "chapter": 24,
            "verse": 37,
            "name": "Luke 24:37",
            "text": "Presas junos perelales de dal, y canguelo, penchababan que diquelaban yeque barbal\u00e9."
        },
        {
            "chapter": 24,
            "verse": 38,
            "name": "Luke 24:38",
            "text": "Y les pen\u00f3: \u00bfPres\u00e1s terelais dal, y costunelan pensamientos \u00e1 jir\u00e9s carlochines?"
        },
        {
            "chapter": 24,
            "verse": 39,
            "name": "Luke 24:39",
            "text": "Diquelad minrias bastes y minr\u00e9s pindr\u00e9s, que menda matejo sinelo: pajabelad y diquelad, presas yeque barbal\u00e9 na terela brinza ta coc\u00e1lis, sasta diquelais que terelo menda."
        },
        {
            "chapter": 24,
            "verse": 40,
            "name": "Luke 24:40",
            "text": "Y penado ocono, les di\u00f3 as bastes y os pindr\u00e9s."
        },
        {
            "chapter": 24,
            "verse": 41,
            "name": "Luke 24:41",
            "text": "Tami sasta aun na astisirasen creer, sinando maravillados de pesquital, les pen\u00f3: \u00bfTerelais acoi buchi que jamar?"
        },
        {
            "chapter": 24,
            "verse": 42,
            "name": "Luke 24:42",
            "text": "Y junos le lanel\u00e1ron yeque arecata de macho querabado, y yeque frimita de anguin."
        },
        {
            "chapter": 24,
            "verse": 43,
            "name": "Luke 24:43",
            "text": "Y habiendo jamado anglal de junos, ustil\u00f3 as sobras, y se les di\u00f1\u00f3."
        },
        {
            "chapter": 24,
            "verse": 44,
            "name": "Luke 24:44",
            "text": "Y les pen\u00f3: Oconas sinelan as vardas sos pen\u00e9 \u00e1 sangue, sinando aun con-a-sangue, que jomte que se perele o saro ma sinela libanado de mangue andr\u00e9 a Eschastra de Moys\u00e9s, y andr\u00e9 os Prophetas, y andr\u00e9 os Psalmes."
        },
        {
            "chapter": 24,
            "verse": 45,
            "name": "Luke 24:45",
            "text": "Entonces les despand\u00f3 a suncai, somia que jabillasen as randi\u00f1apenes."
        },
        {
            "chapter": 24,
            "verse": 46,
            "name": "Luke 24:46",
            "text": "Y les pen\u00f3: Andiar sinela libanado, y andiar jomte que o Christo urjiyar\u00e1se, y ardi\u00f1\u00e1se al trincho chibes de enr\u00fan os mul\u00e9s:"
        },
        {
            "chapter": 24,
            "verse": 47,
            "name": "Luke 24:47",
            "text": "Y que se chamuliase andr\u00e9 desquero nao penitencia y mecos de grecos \u00e1 sari a sueti, y brotoboro \u00e1 Jerusal\u00e9m."
        },
        {
            "chapter": 24,
            "verse": 48,
            "name": "Luke 24:48",
            "text": "Y sangue marchir\u00e9s sinelais de oc\u00f3nas buchias."
        },
        {
            "chapter": 24,
            "verse": 49,
            "name": "Luke 24:49",
            "text": "Y menda bichabelo opr\u00e9 sangue \u00e1 la buchi prometida de minrio Dada: Tami sangue permaneced acoi andr\u00e9 o foros, disde que sinelais perelal\u00e9s de la sila e udscho."
        },
        {
            "chapter": 24,
            "verse": 50,
            "name": "Luke 24:50",
            "text": "Y os sicab\u00f3 abr\u00ed disde Bethania: y ardi\u00f1ando desqueres hastes os majarific\u00f3."
        },
        {
            "chapter": 24,
            "verse": 51,
            "name": "Luke 24:51",
            "text": "Y anac\u00f3, que o chiros que os majarificaba, se naj\u00f3 de junos, y sinaba lliguerado al Tarpe."
        },
        {
            "chapter": 24,
            "verse": 52,
            "name": "Luke 24:52",
            "text": "Y junos despues de buchararse al chiquen y querelarle adoracion, se limbidi\u00e1ron \u00e1 Jerusal\u00e9m sat bari pesquital."
        },
        {
            "chapter": 24,
            "verse": 53,
            "name": "Luke 24:53",
            "text": "Y sinaban delt\u00f3 andr\u00e9 a cangr\u00ed loando ta majarificando \u00e1 Deb\u00e9l.\u00a0 Unga. Saboca Enrecar Debel Ererio. Chachip\u00e8.  "
        }
    ]
}